拿玻里摧殘紫百合

猪拉多纳

「賓佬」出齊架生搶意盃

意大利盃王者對決今晚開戰，費倫天拿同拿玻里會喺羅馬奧林匹高球場合演巔峰對決。拿玻里喺歐聯同意甲戰場先後Game Over，不過教練賓尼迪斯出名係「盃賽專家」，試問「賓佬」又點會唔想攞番個尾彩吖，拿玻里讓平半一於撐上盤。

（now633及660台周日凌晨3:00直播）
費倫前中後三線殘陣

拿玻里今季畀人嘅落差好大，以希古恩、荷西卡利祖同咸錫為骨幹嘅星級陣容，擺到明就係為意甲同歐聯而打造，偏偏佢哋就喺歐聯分組賽出局，聯賽亦連「一哥」祖雲達斯嘅「車尾燈」都見唔到，意盃作為球隊剩低唯一目標，仲唔搏等幾時？

慶幸「賓佬」昔日執教華倫、利物浦、國米同車仔期間捧過歐聯、歐霸、世冠盃同意超盃等獎項，應付盃賽出名有心得，加上翼衞馬治奧同主力射手希古恩齊齊傷愈候命，齊晒「架生」爭盃。

反觀費倫天拿就濕滯囉，近4場省4粒嘅射手古達度要坐波監，首席門將尼圖亦因手指傷缺陣，加埋保查華利路同干沙路洛迪古斯等大堆傷兵，「紫百合」前中後三線都天殘地缺，點同拿玻里撼呀？