PSG三叉戟劏死火戰車 伊巴謙騷哥利

猪拉多纳

今晚歐聯8強另一線上演豪門對決！巴黎聖日耳門主場鬥車路士，兩軍背後都有個富豪班主撐腰，不過最近走勢極端，法國豪門PSG喺「神塔」伊巴謙莫域孭飛下，今季所有正式賽事只得1場冇波入。相反由「寸王」莫連奴率領嘅車路士近況麻麻，日前連英超榜首都冇埋，張峰睇好PSG今晚拆「車」，直取3.6倍「讓球主勝」。

（有線61、64周四凌晨2:45直播）

PSG喺法甲一枝獨秀，大幅拋離第2位嘅摩納哥13分，既然聯賽無後顧之憂，歐聯勢必全力出擊。佢哋貴為歐洲暴發戶，陣中坐擁唔少星級戰將，「神塔」伊巴謙莫域入球能力唔使懷疑，拿維斯同卡雲尼亦係獨當一面嘅數胡人物。
連贏9場法甲超班

尤其佢哋喺1月簽入法國國腳卡比耶，令陣容更為完整，縱使右閘雲達韋爾受傷避戰，但有查列頂替位置問題唔大，堤亞高施華同阿歷士洛里高呢對巴西中堅更係同聲同氣，成條防線依然咁穩陣。相信伊巴謙喺莫連奴面前都想用「士哥」做見面禮，將球隊連勝紀錄增至10場。
前鋒唔掂車仔焗死守

另邊廂嘅車仔近況麻麻，上輪英超作客水晶宮隊長泰利擺老烏，前線費蘭度托利斯同夏薩特又連番失機，最終以0:1敗走，錄得作客2連敗，仲要讓埋個榜首畀利物浦，士氣又點會好？雖然夏薩特今季狀態大勇，入波助攻停不了，但亦反映車仔欠缺一個可靠中鋒，無論巔峰期已過嘅伊度奧、狀態欠佳嘅費托，定係質素平庸嘅丹巴巴亞，都達唔到「寸王」要求，相信車仔今晚都係死守居多，但對住PSG嘅「豪華三叉戟」唔知頂到幾耐呢？
Data King：伊巴謙歐聯勁入波

‧巴黎聖日耳門箭頭伊巴謙莫域今屆歐聯7場入10球。

&#8231SG近16場歐聯取得11勝4和1負。

‧車路士近9場歐聯比賽，上半場未試過失波。
乜都玩錦囊：車仔半場硬淨捧「和主」

巴黎聖日耳門喺歐聯勢如破竹，連埋16強兩回合計大炒利華古遜6:1，當家射手伊巴謙莫域今屆已經斬獲10球，加上今晚擁有主場優勢，贏波機會確實唔細，但顧及車路士喺近9場歐聯半場冇失過波，不妨冷敲4.4倍「和主」。