千米速勝雷神誇啦啦

猪拉多纳

香港人愛搵快錢又鍾意刺激，短線炒股炒樓真係啱晒嘴形，而馬場中最快收錢就係田草一千米，一分鐘內速戰速決。
       
誇惑

周日就有三場田草一千米，直路王莫雷拉場場有揸拿，大家跟住追買肯定好唔得閒，因為好可能加埋唔夠三分鐘，本錢已經翻幾翻！
       
銳不可擋

今季莫雷拉直路賽有幾勁，單從簡單數據上已完全反映出來，出戰16次已奪7冠3亞，勝出率逾四成，入Q率更超過六成，買佢直路坐騎W或做膽拖Q，收錢機會真係高好多。
       
勁少爺

周日三場直路賽，料又成為雷神表演舞台，頭場大摩件名牌新貴「誇惑」，早就做足工夫等攞威；第六場沈廐「創意寶」同樣由雷神一手操好，初出擺明搶胡格；第八場徐廐「盤滿鉢滿」曾於直路賽贏三個幾馬位，更加唔講得笑。睇嚟雷神今次直路賽牌面完全凌駕其他對手。
       
莫雷拉

至於季內田草一千暫排第二、三位的潘頓及安國倫，前者以「勁少爺」及「貝利奇」兩匹坐騎較具機會；而長人安夥拍的直路專家「銳不可擋」，亦有資格抗衡莫雷拉。
       
安國倫

最後一提今季直路賽盲門騎師，韋達竟榜上有名，此子今期因停賽，開齋期又要順延了；另外還有八人包括：郭能、梁家俊、黎海榮、何澤堯、楊明綸、湯智傑、薛寶力及吳嘉晉，皆在同程輸到「直」。