飛躍馬體會 褪色AC 巨星大匯演

猪拉多纳

歐聯16強次回合生死激戰！

歐聯16強戰火重燃，力爭17年嚟首度躋身8強嘅馬德里體育會，今晚回師卡達朗主場同AC米蘭合演次回合激戰。計牌面梗係馬體會秤先，弊在1.37倍主勝冇乜肉食，既然「床單兵團」射手迪亞高哥斯達咁堅，最近仲連韋拿都翻生，撞正總比數落後1球嘅「紅黑兵團」肯定豁出去狂攻，1.78倍大好路喎！

（有線62及202、中央5台周三凌晨3:45直播）

首回合馬體會憑迪亞高哥斯達一箭定江山，作客以1:0砌低AC先下一城，呢支西甲「二哥」今屆歐聯主場話就話全勝，不過教練施蒙尼一樣唔敢掉以輕心，上場西甲就將中場阿達杜倫收起，咁啱迪亞高哥斯達又坐波監，今晚佢兩個齊齊回歸搏殺，除咗鋒力夠晒保證，亦證明施蒙尼都覺得1球領先優勢唔穩陣，準備次回合返主場再攞AC命。
韋拿破入球荒

最令施蒙尼高興嘅，係成個月冇「士哥」嘅韋拿，對切爾達場波終於打破入球荒梅開二度，有上述呢三位巨星孭飛，使驚冇波入咩？查實馬體會近年真係好犀利，由西甲二線頭隊伍，一躍成為歐霸盃冠軍，到依家仲變身人見人怕嘅歐洲豪門，當中最大功臣，肯定係教頭施蒙尼！小弟深信有施帥領軍，馬體會要晉級應該冇乜難度，只係考慮到防中堤亞高文迪斯因膝傷缺陣，防守力或多或少削弱咗啫。
巴神輕傷上陣成疑

昔日歐洲王者AC就慘咯，首回合落後1球，要作客絕地反擊相當困難，計吓條數，歐聯贊助、門票同直播費樣樣都係錢，意媒話AC入唔到8強嘅話將會賺少800萬歐元（約8,611萬港元），所以就算隊長蒙杜利禾停賽，今仗都會同AC太子女芭芭拉齊齊入場打氣，《米蘭頻道》賽前話巴洛迪利有輕傷未必出得，但場波咁關鍵，而且「巴神」上仗對烏甸都有後備落場，證明佢嘅肩傷已好得七七八八，照計呢位AC神鋒點都會紮住上。

係，「紅黑軍」上場聯賽以0:1不敵烏甸尼斯，但施多夫明顯留力，除咗收起卡卡，泰拉拔亦只係做後備，準備今晚先出擊搏殺，即使本田圭佑唔合乎上陣資格，但以「巴神」同卡卡嘅「卡士」，要撕破馬體會防線唔係天方夜譚。呢場波與其吼熱到冇肉食嘅主勝，倒不如轉捧入球大仲好。
Data King：AC訪西班牙例衰

‧馬體會近16次主場出戰歐洲賽贏15場。

‧馬體會喺今屆歐聯仲未輸過波。

‧AC作客西班牙球隊取得4勝6和15負。
首回合：馬客勝1:0