噴射機 悉尼巨星「大」比併

猪拉多纳

澳職季後賽話就話10隊有6隊可以入圍，但咪一樣爭崩頭！好似依家咁，第3至第9位只係差6分，贏兩場波已經返晒嚟，所以排喺第8嘅紐卡素噴射機今日主場迎戰排第6嘅FC悉尼，都係爭季後賽嘅關鍵戰嚟o架！兩隊為爭入前6，近排都的起心肝爭取好成績，尤其係噴射機前鋒希斯基已擺脫傷患，FC悉尼射手迪比亞路又愈老愈可愛，兩大球星同場比併肯定有火花，博1.85倍入球大。

（有線64及203周六下午2:30直播）
希斯基 迪比亞路齊回勇

噴射機7場不勝後，上仗竟然爆大冷，作客贏榜首布里斯班獅吼，令球迷大跌眼鏡。事實上，自從佢哋搵咗辛尼做教練之後，成隊波表現的確有起色，前鋒阿當泰加特近3場入3球，加埋英格蘭前鋒希斯基都話自己傷好後，希望可以最後衝刺全力出擊，小弟梗係信佢會交到貨啦！

FC悉尼兩連敗後，上周亦擊敗珀斯光輝成功反彈，意大利前鋒迪比亞路雖然3場冇入過波，但佢同拍檔迪斯普杜域就合作得愈嚟愈好，二人操練後更齊齊主動加操，合作練射罰球，相信呢對進攻組合會不斷進步。更何況迪斯普杜域要博FC悉尼同佢續約，嚟緊當然要爭取表現，盡力數胡攞多啲討價還價本錢啦！
頂占筍盤：紐卡素噴射機 Vs FC悉尼（入球大）