文家良贏勝利攻略續帶頭

猪拉多纳

依家分別響騎、練成績榜居於首位嘅潘頓同文家良，今季合作都可算係如魚得水，尋日合作兩駒當然唔會空手而回，「勝利攻略」喺佢哋聯手下就順利連捷，文家良亦憑呢場溫拿累積今季第10Ｗ，成為首位頭馬數字衝破雙位數嘅練馬師，喺練馬師榜力壓徐雨石同告東尼，繼續帶頭，都咪話唔威水。
       
文家良
升班仍有得爭

據文家良表示，「勝利攻略」響潘頓胯下，上仗終於打破悶局，今次再下一城，雖然贏得較吃力，但其實因為隻馬身形較為矮細，今次要孭重磅兼排外檔起步，賽前形勢絕對唔算理想，不過沿途際遇唔曳，加埋潘頓施展渾身解數，人馬發揮相當出色。練者認為以目前進度，「勝利攻略」升上三班孭輕磅專注跑一哩，仍有爭取頭馬機會。