英格蘭淨識o趙魚腩 啃唔落黑山

猪拉多纳

心理壓力大 對強隊和晒

2014巴西世界盃外圍賽嚟到終極衝刺階段，英格蘭今晚會喺H組主場迎戰黑山。咪以為「三獅兵團」依家排喺小組第1好巴閉，查實佢哋只係專食魚腩，遇上硬淨對手例牌贏唔出，加上佢哋為爭出線，最後呢2輪不容有失，強大心理壓力下勢必影響發揮，要讓波出擊，力奇寧願捧3.2倍「讓客」。

（now621台周六凌晨3:00直播）

歐洲區H組目前形勢混亂，「一哥」英格蘭、烏克蘭、黑山同波蘭4隊之間相距最多3分，大家都有出線機會。雖則話今晚嘅「英黑戰」同「烏波戰」勝負對出線形勢有重大影響，但大家更需要知嘅係，黑山同烏克蘭喺下周最後一輪只會分別遇上弱旅摩爾多瓦同聖馬力諾，反而「三獅兵」仲要作客硬撼波蘭，換句話講，英格蘭今晚一旦搞唔掂黑山，想進軍巴西決賽周，認真危危乎，你話壓力大唔大先？
「A高」打柴 「雙特」唔夾

再者，英格蘭8戰得16分排榜首好似幾威，但仔細睇番賽績，原來佢哋4場勝仗全部都係贏摩爾多瓦同聖馬力諾，反而對住同組其他硬嘢就全部和晒。就連佢哋所入嘅25球，有22球都係喺兩隊魚腩身上取得，對住強隊就4戰只入3球，火力根本唔合格。

當然，英格蘭近排有利物浦新星史杜列治狀態冒升，加上朗尼又有貨交，仲有阿仙奴中場韋舒亞都慢慢踢出球星風範，聽落呢個鐵三角應該唔差。不過，領隊鶴臣預計會再次重用一直夾得麻麻嘅「雙特」做中場，呢個已經係一大隱憂，正選左閘「A高」艾殊利高爾又傷埋，加埋門將赫特近排失準，力奇真係擔心佢哋守唔住黑山突擊囉。

黑山雖則話大牌球星唔算多，數嚟數去都係胡仙歷同祖維迪，前者今晚仲話有傷唔踢得，然而大家睇番往績，原來黑山對住「三獅兵」素來都有一手，今次分組賽首循環對決，加上2012歐國盃外圍賽2次交手，佢哋合共3鬥英格蘭全部和晒，今晚再次守死「三獅兵」又有乜咁出奇？
Data King 近3次對賽全部和波

‧雙方過往3次碰頭全部打和。

‧黑山最近6場作客3勝3和未輸過。

‧英格蘭喺分組賽場場有波入的定律，於上輪被烏克蘭打破。
世盃外歐洲區H組