蘇永強讚忠心 逸逸友福強組突圍

猪拉多纳

今日尾場二班1200米強組賽事，已7歲嘅「逸逸友福」面對一眾強敵，機會係點？馬主蘇永強分析道：「不經不覺，『逸逸友福』今季已經踏入7歲高齡，呢匹馬在港出道至今共贏得5場頭馬，累積超過300萬獎金，係一匹難得嘅忠心佳駟，更帶畀我好多愉快回憶，例如今年年初三咁啱60歲大壽，就贏馬幫我賀壽，真係有靈性。另外，要讚吓鄭俊偉保養馬匹功夫真係掂，雖然『逸逸友福』上季尾連番拚搏，體力消耗唔少，但經過抖暑稍事休息，狀態已好快操番起。今場二班賽無疑對手實力甚強，『逸逸友福』難言取勝把握，但未熱身縮程跑1200米應有幫助，加上匹馬夠忠心，憑輕磅之利，有望炮製驚喜賽果。」