帕爾馬往績輸晒 「紫百合」讓主咪走雞

猪拉多纳

費倫天拿上場輸畀國際米蘭，球隊今季聯賽不敗身慘被打破，試問成班球員條氣點會順，梗係想搵人出氣喇。佢哋今晚喺主場迎擊防守甩漏甚多嘅帕爾馬，相信係時候大開殺戒，2.38倍「讓球主勝」唔好錯過。

（開賽時間︰周二凌晨2:45）
費倫天拿羅斯仔Fit爆

「紫百合」今季表現對辦，今場又有中場核心大衞比沙路復出，有佢落場幫手派牌，隊波嘅攻勢更見流暢，配合中場阿古蘭尼、祖亞昆、保查華利路，肯定可以提供唔少彈藥畀射手基奧斯比羅斯。以呢位意大利前鋒近5場聯賽入5球嘅Fit爆狀態，就算少咗另一個前鋒拍檔馬里奧高美斯亦冇有怕。

對手帕爾馬上仗取得聯賽首勝，但佢哋嘅防守差到嚇死人，近4場比賽入面，竟然有3場賽事失3球！而且前鋒阿馬利上場領紅，今仗要停賽，另一鋒將卡斯辛奴亦無復當年勇，聯賽至今只係攻入1粒，加上中場加路柏、守將柏列達休戰，真係好難叫人支持。咪忘記帕爾馬近3次作客費倫天拿，每場至少吞2隻蛋而回，睇怕今次都唔會例外。