山神造勢踩扁向日葵

猪拉多纳

出新產品「打劫」球迷

連續8場不敗嘅山形山神，呢排谷緊批新產品掠水，仲主動參與東日本大地震嘅復興活動，擺明喺度造勢，今日佢哋主場迎戰北九州向日葵，1.65倍主勝有得諗。

（開賽時間：周日下午3:00）
搞足球教室支援地震災區

家陣排響日乙第8位嘅山形，只係少第6位嘅千葉市原5分，仲有機會打入升班附加賽，聯賽依家只剩8場波，佢哋梗係要發力啦，山形近8場聯賽加盃賽未輸過，就反映到呢班波嘅心態。

事實上，山形班人唔為升班，都要為個會賺錢而搏，因為由今日開始，佢哋又推出一批新產品，波衫自不然唔少得，連冬季系列嘅頸巾都有，就係要班Fans擺低啲幫補吓個會。為咗谷行個勢，早兩日山形仲派咗石井秀典、宮阪政樹幾個搞足球教室，同班岩手縣細路鬥波，當係支援東日本地震災區添。

如果齋睇往績，山形對住北九州3戰全勝，今日應該啅硬，更何況比嘉厚平，林陵平同羅美路法蘭克3件攻擊球員已經復操。不過對手近況都唔曳，近4仗贏咗3場。而且個「4-4-2」陣式好穩陣，想大炒佢哋唔容易，買主W穩陣啲。