奧厄跌勢持續有排衰 科特布斯客W有計

猪拉多纳

本周德乙直播賽事為奧厄主場對科特布斯，暫時德乙踢咗4輪，其中一支表現最反覆肯定係奧厄，佢哋頭兩場聯賽勝出之後突然大趺Watt，連同盃賽及聯賽錄得3連敗。似乎奧厄團火已經熄咗，對住爭取升班資格嘅科特布斯難有甜頭，客W有超兩倍分頭，捧得過。

(有線64及203台周六凌晨零時30分直播)

奧厄季初頭威頭勢連贏，點知強勢未能持續，本月初先喺盃賽畀低組別球隊奧斯納貝克勁數3蛋，及後返聯賽對住阿倫及凱沙羅頓都輸波而回。奧厄受到挫折之後，未必可以喺短期之內重拾信心，就算主場出擊都有保留。其實喺對賽往績方面奧厄都處於弱勢，近6次對賽輸咗4次，睇嚟佢哋今場都幾難反彈。
辛洛高腳風順

科特布斯今季主要目標係爭上德甲，論球員質素當然喺對手之上，切勿因作客就輕視佢哋。特別要留意上周科特布斯以5比1大數阿倫，球隊盡顯強大入球能力，其中科特迪瓦國腳辛洛高已經取得6個聯賽入球，今場面對奧厄隨時再有進帳。可以講科特布斯愈踢愈進步，要贏奧厄唔係難事。