奇無極王志偉今季第三W

猪拉多纳

本地薑王志偉下季仲可唔可以有牌策騎，依家仲係未知之數，事關佢遲啲要同牌照委員會解釋續牌原因。不過，偉仔講明自己唔會放棄，希望繼續喺香港騎馬，佢講得出做得到，尋日沙田賽事靠師傅葉楚航嘅「奇無極」贏出個人今季第三Ｗ。
       
奇無極一放到底輕鬆取勝。

王志偉今次可以騎呢隻「奇無極」贏馬，其實都有啲運仔，皆因呢隻馬不嬲係鄭雨滇嫡系坐騎，但阿滇啱啱禮拜三快活谷夜賽墮馬跌斷手需要休息，偉仔才可以冷手執個熱煎堆，而佢都不負師傅葉楚航所託，順利幫呢隻馬補中。
       
葉楚航（左）
增加續牌本錢

航哥賽後就話「奇無極」上鋪沿途畀隻「偉寶之星」拍實鬥燒，消耗咗唔少氣力，加上頭馬「輕彈錢笑」超班，跑到第三其實已經唔算差，今組四班千二米對手明顯弱好多，「奇無極」出閘順利就此一放到底掄元，亦非常合理。王志偉在此重要關頭勝出此場賽事，相信對續牌必有幫助。