皇仁威龍人馬破悶局

猪拉多纳

本地薑梁家俊自從４月28日贏咗隻「豐彩人生」之後，手風欠順一直與頭馬無緣。尋日田戰，俊仔終於靠隻處女馬「皇仁威龍」取勝，人馬齊齊打破悶局，呢場亦係佢同高伯新馬房季內合作首Ｗ。
       
皇仁威龍轉倉第二仗就打破悶局，高廐省靚招牌。

高伯新對馬主區啟光嘅馬似乎特別肉緊，之前區生有份嘅「卡加大師」、「卡加精神」同「皇龍戰駒」轉去高廐都有馬贏，「皇仁威龍」上鋪轉倉初出喺五班已跑第三，今次升上四班表現更理想，順利贏馬開齋。賽後區啟光就話，「皇仁威龍」上場隻腳有小小事，結果都跑季軍，今次孭輕磅抽好檔，補中唔意外，佢仲大讚梁家俊發揮出色，因為佢擔心「皇仁威龍」增程跑一哩捱唔到尾，好彩鞍上人夠耐性，入正直路先發力衝刺。另外，「皇仁威龍」雖然體重冇乜變化，但明顯比前壯咗，區啟光希望隻馬保持健碩，日後孭重磅都唔怕。