超霸鷹爭出線勢擒肯尼亞

猪拉多纳

世界盃非洲區外圍賽第二圈F組賽事形勢緊湊，四隊都仲有機會出線，今晚上演包尾嘅肯尼亞主場迎戰榜首球隊尼日利亞，主隊靠三大天王撐起球隊，但今戰有兩件唔出得，淨番中場雲耶馬一個打晒，對住非洲冠軍尼日利亞睇怕唔夠揪，受讓都冇用，蘇豪捧客勝！

（周三晚9時開賽）

請恕小弟才疏學淺，成隊肯尼亞只識陣中三粒星，包括阿些斯奧前鋒奧列治，上季由國際米蘭外借至帕爾馬嘅中場馬列加，以及成為曼聯及阿仙奴等大會目標嘅些路迪中場雲耶馬。若然集齊呢三位仁兄，蘇豪相信肯尼亞絕對有力同對手砌過，不過今戰奧列治要坐波監，馬列加受傷缺陣，三大天王只剩雲耶馬，令球隊實力弱上加弱，睇怕今仗就算有主場之利都係冇乜作為。
車路士雙星孭飛夠殺

尼日利亞稍後要出戰洲際國家盃，佢哋今次點兵都係正常人腳，「車路士雙星」約翰米基爾同域陀摩西斯都在陣，雖然去咗美國搵食嘅射手馬田斯冇份入選，但照計都夠殺o架喇。根據賽制，第二圈只得首名球隊可以晉級，尼日利亞現時同次席球隊馬拉維同得五分，只領先第三位納米比亞兩分，因此出線仲未穩陣，相信「超霸鷹」今次會肉緊啲，正路可順利取勝，客勝值得捧場。