阿仙奴撚鵲保四爭三

猪拉多纳

阿仙奴帶住保四爭三目標造訪「喜鵲」紐卡素，大有不勝無歸之感。反觀「喜鵲」已經護級成功，賽季如同提早結束，主帥柏杜上周更講出心聲，揚言煞科戰淨吞四蛋都冇所謂，軍心渙散，無力阻擋氣勢如虹嘅「兵工廠」，今戰熱捧客W！

自從三月中喺歐聯作客戰勝拜仁慕尼黑光榮出局後，阿仙奴之後九場聯賽七勝兩和，教頭雲格都話贏拜仁一役非常重要：「嗰場波真係好重要，贏完之後你會感覺班球員唔同晒，我哋開季失去咗尹佩斯搞到冇晒信心，家陣有番士氣，一定要贏埋呢場關鍵大戰！」「兵工廠」中場主力阿迪達有傷未必踢得，但可由韋舒亞或路斯基頂上，其餘主力都可候命。
紐卡素護級成功等收工

另邊廂紐卡素氣氛好唔同，佢哋上周贏波提前上岸，主帥柏杜賽後風騷到爆，竟然話唔介意下輪對阿仙奴輸0比4，呢番言論辣慶唔少熱刺球迷，柏杜馬上補飛話只係講笑，講乜笑吖，分明就係講出心聲啦！「喜鵲」完成護級大業已無包袱，今仗門將告魯爾及中場穆沙施素高等主力都唔踢得，後備門將洛艾利洛又要停賽，要用到季尾離隊嘅名將夏柏把關，情況真係唔多樂觀。

兩隊首循環碰頭，阿仙奴主場以7比3狂數紐卡素，射手禾確特入三粒，中鋒基奧特亦建兩功，今次呢個前鋒組合再次拍住上，有力再度連番撕破「喜鵲」防線，客勝捧得過，可博埋「讓球客勝」。