蘇斯達洩憤爆格

猪拉多纳

今晚賽事唔多，其中西甲獨腳戲又係皇家蘇斯達守尾門，返主場出戰CF格蘭納達，上輪作客被基達菲反勝兼中止連續15場不敗佳績，令佢哋爭來屆歐聯資格出現暗湧，但受過教訓之後，蘇斯達唔會再大意，加上射手卡路士韋拿及時打破入球荒，呢條「地頭蟲」可贏實力遜一籌嘅CF格蘭納達，斯維認為「讓球主勝」好路。

（周二凌晨4時開賽）

所謂驕兵必敗，蘇斯達上仗開波5分鐘就先開紀錄，成班球員以為自己贏梗，踢到有啲飄飄然，最終被基達菲連省兩粒反勝，賽後教練蒙坦尼亞嬲到爆，省到全隊立立令，蘇斯達球員今仗會打醒十二分精神小心應戰，唔會再重蹈覆轍，況且首席射手卡路士韋拿上仗打破三輪冇波入嘅頹勢，重拾信心。
CF格蘭納達主力缺陣

唔計周日賽果，依家蘇斯達只係領先第五位的華倫西亞2分，張歐聯入場券唔係袋袋平安，為名為利一定唔會揸流攤。雖然CF格蘭納達近期為護級亦場場搏到盡，但有耶巴達及丹尼賓尼迪斯因傷倦勤，打擊極大，今仗作客都係有心無力，蘇斯達要淨贏兩粒冇難度。