黃蜂狐狸喪攻鬥入波

猪拉多纳

「黃蜂」尾後針夠毒，喪攻「狐狸」夠癲，邊個死好難講，總之就係多波入！英冠附加賽四強次回合生死鬥，屈福特主場硬撼李斯特城，首回合屈福特輸0比1，今場要焗攻，前鋒迪尼復出弗晒；客軍領隊皮雅臣話明會鬥攻，今場癲鳳鬥狂龍，捧大！

（周日晚7時30分開賽）
屈福特有信心反先

首回合「黃蜂」屈福特先作客「狐狸」李斯特城，雙方小心翼翼戰情膠着，屈軍「英冠最佳球員」馬迪維達，換邊後曾有入波黃金機會，但佢竟然射咗唔知去邊，最終完場前「狐狸」前鋒紐根特一頭鑿死對手，贏1比0完場。雖然揸住一球優勢，但教頭皮雅臣話冇乜用；屈軍領隊蘇拿，仍對晉級充滿信心。

屈福特能成聯賽季軍，因球隊擁有強大攻力，全季攻入85球成聯賽入球王。雖然馬迪維達狀態一般，但本季射入19球嘅迪尼能夠復出，大大增強進攻火力。皮雅臣話作客「黃蜂」死守等於自殺，故恃紐根特同基斯活特大勇，將同對手鬥攻。雙方唔係你死就係我亡，捧大啱數。英冠附加賽不設作客入球優惠，兩回合總比數打和將加時30分鐘，再和就射12碼決勝。