ＱＰＲ散晒紐記有救

猪拉多纳

原本以為韋根又再次絕地翻身，殊不知周中居然反勝為敗，輸畀冇嘢好爭同埋近期陷入球荒嘅史雲斯，一切都怪韋根兩次防守失誤，自己攞嚟衰！同樣全力護級嘅紐卡素，只要佢哋今晚搏老命贏咗昆士柏流浪，護級前途一片光明。

（有線302及202台周日晚10時直播）
昆士柏降班變散班

紐卡素下輪要對剋星阿仙奴，今晚呢三分真係可以話係決定來季命運。呢場要南下作戰，領隊柏杜迎來喜訊，迪保治停賽期滿重返戰場，仲有大衞辛頓、馬維奧斯傷愈，同埋森美艾美奧比外借期滿歸隊，令柏杜總算多番幾個球員用，臨場調動當然更得心應手。

昆士柏流浪篤定降班，更傳出印度財團可能會撤資，呢鋪真係隨時降班變散班。佢哋季中係有過小陽春，但最近兩個月已經冇贏過波，最巧合嘅係佢哋對上四次面對紐卡素，食足四場白果，一球都入唔到。ＱＰＲ今季主場成績係全英超最差，所以小妹力撐客勝，支持紐卡素護級成功。

完場後記得轉過去英超300同高清200台啊，因為奧脫福會有冠軍頒獎儀式，雖然曼聯捧盃是常識，但送別費格遜只此一次，各位球迷唔好錯過！

Kit 推介：紐卡素 勝