費倫巴治主場迎賓受讓着數晒

猪拉多纳

同晚另一場歐霸盃4強首回合，土耳其「二哥」費倫巴治主場迎戰葡國班霸賓菲加。費倫巴治近年頻傳打假波，令球隊個朵臭晒，今屆難得殺入準決賽，眾將必想贏波省靚番個招牌，況且賓菲加過去作客「火雞國」未嘗一勝，今仗仲要讓波純粹係名牌效應，費軍有得受讓可捧「讓球主勝」。

（有線62及202台周五凌晨3時05分直播）
為洗脫污名而戰

2011年費倫巴治前會長爾迪林同兩名球員因為打假波而坐監，更累到球隊當年被褫奪參加歐洲賽資格，直至去年歐洲足協先至減輕處罰，但醜事傳千里，費倫巴治已被標籤為假波球隊。人要面樹要皮，費軍洗脫污名，當然要用行動證明自己，因此該隊今屆於歐洲賽特別落力，尤其係今年歐霸淘汰賽6場不敗，先後擊退巴迪、柏辛域陀尼亞同拉素，個勢咁旺勒都勒唔住。
賓菲加征土往績差

當然，賓菲加亦非善男信女，該隊依家於聯賽、葡盃、歐霸叫三飛，阿根廷翼鋒伊度亞度沙維奧腳風好順，不過正係三線作戰關鍵時刻，為保元氣，作客或打穩陣波。

況且土耳其係「葡國雄鷹」的凶地，佢哋過去於歐洲賽作客土國只取得2和1負，要讓波實在過晒火位，加上費倫巴治有經驗豐富的卡錫、尤保、古積特等球星助陣，古積特更於09/10年歐霸協助利物浦反勝賓菲加晉級之役有士哥，今仗有地利兼受讓，真係筍到爆，「讓球主勝」咪錯過。