仙台維加泰「武」心爭勝吼細

猪拉多纳

亞冠盃E組今晚有好嘢，武里南聯今晚喺主場對仙台維加泰，入球細最抵玩，事關維加泰怕咗泰國嘅酷熱天氣，竟然安排4個主力留喺日本冇隨隊，教練手倉森誠仲話明和波都願，諗法咁消極唔慌肯攻，玩1.59倍入球細穩陣！

（now671台周三晚7:00直播）

作為上季日職亞軍，維加泰家陣喺聯賽排第12位，表現絕對唔合格，教練手倉森誠明白球隊唔夠人腳雙線作戰，索性叫中場梁基勇、菅井直樹、富田晉吾同後衞鐮田次郎喺日本休息，寧願揀7個新仔去做後備。手倉森誠更加話，首次出席亞冠盃絕對唔易踢，呢場和波已經好滿意，完全冇心爭勝。最抵死係佢哋尋晚响武里南個主場進行適應性訓練，手倉居然大讚人哋個場地燈光一流，慨嘆仙台個泉足球場唔掂，似去考察多過搏命。
武里南聯火力唔掂

更甚嘅係，現時仙台地區氣溫得攝氏10度左右，泰國就超過30度，濕度超過百分之六十，溫差好大，就算維加泰有射手赤嶺真吾最近好番，都唔似惡得出樣。武里南聯喺首循環作客以1:1打和維加泰，雖然佢哋陣容唔弱，中場甘美奧干沙利斯踢過希杭，又有幾個泰國國腳壓陣，弊在火力始終唔夠玩細着數。
亞冠盃賽制

32隊分8組，每組4隊進行雙循環賽事，每組首、次名將躋身16強。

亞冠盃E組