跟紅頂白撐蘇斯達

猪拉多纳

今晚英超重頭戲係利物浦主場對車路士，初盤利物浦讓到半球，肥叔望到個盤都打個突，老老實實，論人腳同級數，「紅軍」完全唔係車仔嗰皮，莊家直頭將利物浦當係曼聯級數，到底點解會咁開盤，真係好難解釋。若果大家呢場想玩盤，一係唔買，一係就買下盤，個人認為玩大盤最好。

講番是日重心場次先，去到季尾階段，西甲球隊皇家蘇斯達好犀利，勒都勒唔住，呢間球會本身組織好，隊內冇乜天王巨星，但踢落唔係人咁品，今季曾經砌低班霸巴塞隆拿，喺西甲真係冇乜邊隊做到。蘇斯達好有機會取得歐聯席位，去到最後直路會更加肉緊，今次作客奧沙辛拿要讓平半，個盤都算合理，一於跟紅頂白捧上盤。

（now 632周一凌晨1時直播）
卡坦尼亞主場又搏殺

同日意甲賽事卡坦尼亞主場對巴勒莫，卡坦尼亞不嬲都係大戶愛隊，每逢主場賽事就係搏殺時候，經過連續兩場同對手互交白卷後，卡坦尼亞並冇退熱，今場仍然要讓半球，個盤相當硬淨。巴勒莫近期稍有起色，但呢班波作客始終靠唔住，今次相信都係冇運行，呢場捧上盤！（周日晚9時開賽）