幼獅噬羅馬尼亞捧「讓主」

猪拉多纳

英格蘭U21今晚喺主場迎戰羅馬尼亞U21雖然只係熱身賽，但就咪以為班「幼獅」會懶懶閒，實情主帥皮雅斯講明會喺今場「驗貨」之外，仲話想以9連勝姿態出戰U21歐國盃決賽周，收晒柯打嘅「幼獅」梗係識做啦，1.77倍「讓主」依絲執。

（now633及660台周五凌晨3:00直播）
7連捷0失球Fit到漏

「幼獅」喺上月初4:0大炒瑞典U21後，創下7連勝0失球紀錄，氣勢真係勁到冇朋友，但主帥皮雅斯喺提醒佢哋唔好畀勝利沖昏頭腦嘅同時，亦叫班「幼獅」要保持對勝利嘅飢渴感，咁先有動力狂噬對手。況且今場對羅馬尼亞同下星期二鬥奧地利後，跟住就係6月嘅U21歐國盃決賽周，因此皮雅斯講到明呢兩場係「最後閱兵」，咁嘅情況班「幼獅」當然會自動波搶韁啦！

雖然熱刺後衞哥爾卡提升咗做大國腳，但係「幼獅」向來唔怕冇人用，除咗奇治戴臣同丹尼路斯領銜嘅防線夠晒穩陣，利物浦三寶舒維爾、佐敦軒達臣同史達寧，連埋潛力新星蘭斯貝利同麥伊治蘭，真係件件中場都咁足秤，至於前線有迪爾科尼素同湯馬士恩斯呢對黑池進攻拍檔亦都夠照。另邊廂羅馬尼亞U21除咗隊長史坦斯奧叫做經驗豐富啲，稍為見得吓人嘅中場拉杜特同安拿治又超齡講拜拜，依家得番班未見過世面嘅生牯仔喺度，落到場隨時震過貓王，想輸少粒都難！