祖記狂o趙卡坦尼亞

猪拉多纳

開水喉擴軍冧掂干地

祖雲達斯啱啱喺歐聯躋身8強，家陣可以集中番火力鞏固意甲榜首位置，佢哋今晚會喺主場恭候卡坦尼亞，「斑馬兵團」高層為咗安撫教練干地，賽前已經披露咗一大堆組軍計劃，高層咁畀面，相信干地同班手足實會繼續交足貨，對住後防成盤散沙咁嘅卡坦尼亞，1.68倍「讓主」點可以唔捧呀？

（中央5台周日晚10:00直播）
低成本打入歐聯8強

《米蘭體育報》前晚攞番祖雲達斯04至06年球季嘅陣容同依家做比較，比起當時雲集杜林、簡拿華路、韋拉、森保達同伊巴謙莫域嘅金鑽陣容，家陣嘅「斑馬兵團」又真係幾寒酸。當時領軍嘅卡比路連續兩屆都唔能夠帶隊殺入歐聯8強，反而干地靠「低成本製作」就交足貨，自己咁搏命但球會唔識做，意大利傳媒話佢老人家都開始心灰意冷喎。
三大箭頭輪流數胡

好彩，高層唔想干地唔Happy都急急腳補鑊，一方面話會盡早同派路等球星續約，嚟緊仲承諾會科水擴軍，班高層咁識做，干地條氣肯定順番晒！祖雲達斯目前只係領先次席嘅拿玻里6分，今晚雖然有維達爾停賽，但胡仙歷、馬特尼同加利亞雷拉最近輪流數胡，對住上仗Lead緊國米兩粒都可以輸番3球嘅卡坦尼亞防線，絕對有力乘勇大開殺戒！