前鋒三神「大」有睇頭

猪拉多纳

中村憲剛 大久保嘉人夾攻

川崎前鋒今晚喺日職對大分三神，入球大要繼續追。雖然前鋒喺開咧戰以1:3慘負柏雷素爾，連續8季開咧戰不敗走勢斷纜，不過重新擔任隊長嘅中村憲剛已好番，加上新加盟嘅射手大久保嘉人講明搏命，有本錢「大」起三神！

（開賽時間：周六下午2:00）
前鋒簽戈亞尼恩斯射手

雖然中村憲剛因為身體不適錯過開咧戰，但佢喺網誌報料話已經全面復操，如無意外今場會領軍出戰。同時，開季前由神戶勝利船加盟嘅前鋒大久保嘉人講明，今季目標係至少攻入15球，而且前鋒今季羅致咗戈亞尼恩斯射手安達臣柏德列，為咗爭入正選陣容，相信佢落到場肯定會搏盡，有利開入球騷。

另方面，大分三神升班後有前鋒三平和司離隊，好在射手森島康仁繼續留效，而且新簽入嘅川崎前鋒箭頭小松壘，照計會提供唔少意見畀新隊友，點樣可以攻破對方嘅豆腐後防，佢自己落場就當然係更加肉緊啦。睇番三神上星期主場對FC東京，都能夠先開紀錄，呢場對住防線兒戲嘅前鋒，梗係要玩「大」佢啦。