文仙尼激將法逼眾星交貨

猪拉多纳

曼城領隊文仙尼話只要贏晒餘下比賽，話唔定會喺英超奇迹後上封王喎，但查實點計，都唔夠只要踢多3場波就捧足總盃咁實際，況且「藍月亮」落晒柯打要瘦身，球員為保飯碗，今晚對住班士利，肯定病貓當老虎打咁搏老命！
英總餘下對手冇料到

費格遜眼白白睇住三冠王美夢幻滅，除咗球證，仲要賴埋曼城，事關曼城竟然借個場畀皇馬操弗備戰歐聯，曼市雙雄嘅深仇大恨已牢不可破。家陣嚟到足總盃戰線，紅魔要硬撼車仔，剩番嘅4隊分別係愛華頓、韋根、米禾爾同布力般，睇牌面，曼城只要生生性性，呢隻盃應係囊中物，賽前文帥仲出埋激將法，話會𥄫實球員嘅表現，邊個冇料到就要執包袱，誓要逼眾將使出真功夫。

雖然球季仲有兩個月至收工，但文仙尼咁講一講，就搞到曼城每場波都好似煞科戲咁搏到盡，今晚眾星只要使出8成功力，就足以摧毀同佢哋差幾皮嘅班士利！