勝利 噴射機後防中門「大」開

猪拉多纳

澳職常規賽殺入大直路，前列分子為咗奠定有利位置躋身季後賽，餘下賽事依然唔能夠鬆懈。墨爾本勝利今日主場恭候紐卡素噴射機，話就話主隊有艾奇湯臣復出救亡，但勝利條防線咁流，艾奇湯臣又幫得幾多吖？對住作客都肯定死攻嘅噴射機吼大仲着數，1.57倍入球大趁熱食。

（有線64及204周日下午2:00直播）
射手艾奇湯臣傷愈復出

今季已經有7個「士哥」嘅艾奇湯臣係勝利食胡人物，呢位射手克服腿筋傷趕及披甲，對球隊嚟講無疑係天大喜訊，但有留意勝利嘅球迷，都知佢哋條防線係幾咁豆腐，近5仗場場失波不特止，上仗仲畀中岸水手6度撕破大門，艾奇湯臣入埋都唔夠後面輸啦！

對家噴射機嘅季後賽席位危危乎，教練艾蒙特近期就落「柯打」，話作客都要當主場咁踢喎！佢老人家冇吹水，上仗造訪威靈頓鳳凰真係踢得好開放，最終贏2:1攞晒3分，今日肯定食過翻尋味。之不過噴射機個後防都唔叻得勝利幾多，開季至今12場作客賽事勁失22球，同勝利鬥攻肯定大把波入，唔怕悶親球迷！