仙台擴軍整武 甲府風林慢熱冇運行

猪拉多纳

日職今日開鑼，上季「二哥」仙台維加泰會喺主場迎戰以日乙冠軍身份升班嘅甲府風林，後者重回日職後雖然賣飯盒搞噱頭，不過升班後反而流失咗唔少主力，反觀仙台為再度衝擊聯賽冠軍大事增兵，要贏揭幕戰例牌不勝嘅客軍唔難，捧1.6倍主勝。
甲府搞噱頭賣敵軍飯盒

仙台維加泰上季以第2名完成聯賽，創下球隊升上日職以嚟最好嘅成績，老闆白幡洋一早排喺新兵發布會，講明今季目標係再次衝擊聯賽冠軍，所以掟錢增兵一啲都冇手軟。雖然中場關口訓充及守將朴柱成離隊，但仙台就喺大阪飛腳收購咗經驗老到嘅佐佐木勇人，防線更有新潟天鵝護級功臣石川直樹加盟，配合上季2名神射手赤嶺真吾及威爾遜洛迪古斯繼續留效，鋒力仍然咁堅，絕對有力轟散新升班嘅甲府風林。

查實重返日職嘅甲府風林都幾有諗頭，每場主場比賽都會賣用敵軍命名嘅大碗飯，實行等球迷「食對手」攞個好意頭，而且每碗只係300日圓（約24.6港元），肯定吸引到唔少粉絲！不過踢波最重要講實力，甲府件上季日乙神射手達維已經轉投鹿島鹿角，後衞富田大介又回歸母會水戶蜀葵，防守大將山本英臣又受傷，睇埋佢哋近14季日職或日乙揭幕戰，有13場都開唔到W，4場日職仲全部輸晒添，今鋪對住雄心壯志嘅仙台維加泰，想搶分都難喇。
（六）5 •仙台維加泰 Vs 甲府風林•

（開賽時間：周六下午1:00）

推介：仙台維加泰（主勝）