狼堡送hea踢丙組仔一程

猪拉多纳

丙組仔奧芬巴克自新帥上任後即刻反彈，不過佢哋話到明要專注護級，今晚德國盃8強戰主場挑戰甲組嘅禾夫斯堡，留力隨時大敗收場，「狼堡」2.3倍-1「讓客」係信心之選。

（無綫翡翠台周三凌晨3:30直播）

教頭列高舒密特真係有啲料到，接手奧芬巴克短短3日，就喺德丙處子戰以2:0砌低沙貝魯根，中止咗近7戰1和6負嘅劣績，被任命做新隊長嘅費舒仲包辦晒兩粒入波。
奧芬巴克護級大過天

再者，日前作客鬥貝豪森場聯賽仲因天氣惡劣延期，抖夠兼夾有主場之利，今晚本來撐硬佢哋，但最弊教頭列高舒密特就話聯賽護級先係首要任務，甚至覺得今戰對禾夫斯堡係負累，直接啲講即係唔會盡砌！

另邊廂，禾夫斯堡雖然喺德甲瀕臨降班邊緣，今場亦未必會全力出擊，不過啲後備兵係講緊養傷多時後力求重拾狀態嘅箭頭希美斯，同埋由多蒙特加盟後為正選位置而努力嘅比列錫，各自有明確目標，配合埋長谷部誠同德拉舒等戰將，面對專注德丙嘅奧芬巴克，淨係計戰意已經抵撐啦！