紅魔順水人情冇撻Q

猪拉多纳

費Sir夏帥friend底有偈傾

英超一哥曼聯今輪聯賽作客包尾大幡昆士柏流浪（QPR），英倫兩大名帥費格遜同夏利列納正面交鋒，兩個老帥不嬲friend底，紅魔鬼家陣喺聯賽甩開次席曼城12分，手執半隻盃耳，費Sir有本錢送個順水人情畀夏利叔，今次佢收起埋射手朗尼，甚有誠意幫老友，一於博「讓球主勝」！

（有線300及200台周六晚11時直播）

費格遜帶領曼聯逐步建立王朝，夏利列納就喺九十年代率領韋斯咸打響名堂，兩個名帥惺惺相惜關係密切。夏利列納上年爭做英格蘭主帥，費Sir多番幫口叫足總請佢，其後熱刺炒夏利叔，費爵爺即時炮轟佢哋管理層亂嚟，堅老友！夏利叔07至08季度率領樸茨茅夫贏足總盃，當年八強戰多得老費讓路先晉級；夏利叔亦好識做，及後帶領熱刺多番還人情輸畀紅魔鬼。依家老友有難，費格遜唔會袖手旁觀。
缺朗尼難破硬淨昆士柏

幫人還幫人，都要量力而為，老費正正係大把在手，聯賽餘下十二輪，曼聯已經掟甩死敵曼城12分，曼城今輪惡戰車路士勝負難料，紅魔鬼印印腳睇好戲，爭勝決心肯定唔及QPR。費爵爺向來懂得留放，今戰唔會冒險用有傷嘅射手朗尼，後防盯人專家菲爾鍾斯有傷要抖，讓咗兩個主將，要做嘅都做晒，就睇QPR自己生唔生性喇！

撇開讓路之說，昆士柏流浪本身喺主場都有料到，自從夏利叔接手後，佢哋主場演出大有進步，主場聯賽已連開三口0比0，先後賽和熱刺同曼城等實力分子，仲曾經作客擊敗車路士，守得好穩。QPR門神施薩索拉斯多次作出神級撲救，仲有大舊中堅基斯杜化森巴幫手頂住，有條件喺曼聯身上搶分，「讓球主勝」有分頭博得過！