曼城為中國市場踢好波

猪拉多纳

今日係年廿九，先同大家拜個早年，祝各位《太陽報》讀者身體健康，萬事如意！邊食團年飯邊睇英超，的確係賞心樂事，睇埋尾場曼城作客修咸頓場波先去行維園，就更加精神爽利喇。

為咗整靚盤數符合財政公平競技原則，曼城幾個月前簽咗份4億鎊嘅中東贊助合約，查實係人都知，呢個所謂贊助商同老闆文梳亞有密切關係，日前歐洲足協（UEFA）話要查數，曼城即晚就發聲明強調財政冇問題，仲叫球迷唔使擔心添，不過英超嗰邊就通過咗財政公平競技，睇嚟曼城真係要醒醒定定喇！
紅軍有超水準先失分

其實講乜都冇用，最實際係有戰績支持，曼城上季一度落後畀曼聯8分，但之後場場波贏晒，最終以得失球力壓紅魔奪冠，家陣「藍月亮」又畀死敵咧住9分，會唔會歷史重演，真係要睇班球員嘅造化喇。事實上，曼城質素點好唔使再多講，連和兩場失4分係講唔通，但其實上仗紅軍有超水準表現，今仗對手換上修咸頓，應該唔會再衰喇啩。

計埋人腳，曼城今仗會有托尼兄弟踢完非國盃歸隊，為龐大嘅中國市場着想，最佳賀年禮物就係踢好波，陪球迷們慶新春，恭喜發財！