近蛇接福買「車」又買「紐」

猪拉多纳

車仔4場不勝勢炒韋根

今日係年廿九，有多場英超賽事陪住大家送龍迎蛇，頭場熱刺主場對紐卡素，拿仁全力支持紐卡素；車路士喺十一點黃金期檔期主場對韋根，蘇豪力撐車仔，希望大家齊齊贏大錢，買「車」又買「紐」！車路士連續四場作客不勝，今次進攻中場夏薩特停賽期滿猛虎出柙，大軍可以喺史丹福橋主場排出最強進攻組合撲擊弱旅韋根，誓必傾盡全力以一場漂亮勝仗挽回面子，熱捧「讓球主勝」！

（有線300及200台周六晚11時直播）

夏薩特早前喺英聯盃作客史雲斯沉唔住氣怒踢執波仔搞出個大頭佛，最終被罰停賽三場算係執到，喺沒有夏薩特嘅日子，車仔進攻大受影響，跟住嗰三場都贏唔到。夏薩特餓波多時，今次帶住滿腔怒氣復出，將會拍住桑馬達喺中場造波，大軍回復雙核進攻模式，將有更多埋門機會。
韋根兩次輸鑊甘

車路士門將施治有傷在身，左閘艾殊利高爾剛代表英格蘭勇戰整親，中堅大衞雷斯繼續養傷，尼日利亞雙星約翰米基爾同域陀摩西斯踢緊非國盃。不過，車仔已經連續四場不勝，近況曳到極，班兵唔敢再揸流攤，大軍急需贏番場振奮士氣，呢個時候遇着弱旅韋根絕對係反彈黃金餐士。

尾三韋根踏入2013年聯賽五戰未嘗一勝，今次即使有射手迪山度倒戈出戰，相信都係冇乜作為。韋根今季對住強隊例腳軟，聯賽鬥曼聯、車路士及阿仙奴全敗，仲要冇波入，佢哋近六次對車仔輸五場，曾經大敗0比6同0比8，今次隨時又輸鑊甘。