比歷連尼有料馬拉加開「薩」戒

猪拉多纳

西甲周日早場由歐聯分子馬拉加打頭陣，雖然呢支所謂「西甲曼城」今季深陷財政危機，萬幸嘅係，喺歐聯及聯賽仍有出色表現，當中教頭比歷連尼可以話居功至偉。
薩拉戈薩連續5場食白果

馬拉加近年迅速冒起，先後簽入辛達告魯斯、沙維奧拿、祖亞昆等具質素球員，踢法耀目之餘兼具娛樂性，令Fans對球隊期望愈嚟愈高。之不過去年入主嘅中東財團玩咗一季後就唔再揼水，搞到又拖糧又要賣人套現，好似陣內無名英雄蒙利爾，效率高之餘仲攻守兼備，可惜佢喺冬季轉會窗最後一日就轉投阿仙奴，對整體實力有一定削弱。

幸好教頭比歷連尼領軍戰術得宜，並深得全隊上下尊重，佢對球員要求嚴格，同時亦畀到各人極大自由度發揮，加上主張快速壓迫對手以搶得控球權，然後配合一眾好技術球員去組織攻勢嘅踢法，都叫做有力同巴塞同皇馬兩大班霸抗衡吓。

至於今晚對手薩拉戈薩近期逐漸跌入降班漩渦，聯賽連盃賽5場不勝之餘仲要一球不入，加埋又受到嚴重傷停影響，今晚作客馬拉加睇怕難有勝算！（now632台周日晚7:00直播）