科特迪瓦強勢獵鷹

猪拉多纳

杜奧巴有嘢撈生猛晒

今晚非國盃8強爆發「象鷹大戰」，爭標大熱門科特迪瓦火併尼日利亞。「大象兵團」科特迪瓦實力明顯超晒班，上仗領隊林武治仲特登收起謝雲奴、耶耶托尼等主力，可謂以逸待勞，隊長杜奧巴搞掂轉會事宜即刻生猛番，面對青黃不接的「超霸鷹」尼日利亞，強捧主W。（now 676周日晚11時直播）

睇過分組賽的朋友，可能會覺得科特迪瓦有點慢熱，其實隊長杜奧巴個時仲煩緊轉會問題，點都有啲影響，但當「魔獸」扑錘轉投土超加拉塔沙雷後，成個生猛番晒，上仗對阿爾及利亞即刻有士哥，唔到你唔服。由於頭兩場贏晒篤定晉級，領隊林武治於上仗例行公事中，收起謝雲奴、耶耶托尼、迪爾尼等主力，大軍叉足電之下，預期今仗會有更佳表現。
尼日利亞靠車仔孖寶難招架

尼日利亞今屆冇馬田斯、烏達卡、奧丹維治、泰禾等大將，單靠「車仔孖寶」約翰米基爾同域陀摩西斯，能夠殺入淘汰賽已算超額完成。唔好睇佢哋分組賽未輸過，頭兩場和波之餘，尾場只係靠兩個12碼先贏到埃塞俄比亞，冇乜說服力喎，面對科特迪瓦的狂轟猛炸，「超霸鷹」難有招架之力，簡單要個主W。