莫連奴徒弟對決 熱刺強兵壓西布朗

猪拉多纳

今晚英超頭場上演寸王莫連奴徒弟對決，西布朗主帥奇勒同熱刺教頭保亞斯都跟過莫帥搵食，論功力差無幾，保亞斯勝在揸住一手靚牌，逐個秤實力一定高過對手，加上西布朗踏入2013年黑氣未除連場失利，似係高開低收格局，今戰主場受讓都信唔過，要熱刺上盤！

（有線200及300台周日晚9時30分直播）
西布朗態沉難變身

奇勒同保亞斯，先後做過莫連奴副手，奇勒捱足十幾年，直到今季先坐正教西布朗，季初領軍踢到曉飛被捧到上天，但去到快車期後班波走晒樣，大軍聯賽連盃賽近七戰兩和五負，喺2013年未贏過，呢個時候先至係真正考驗。球隊喺轉會市場冇乜收穫，射手奧丹維治有離心被雪藏，又少個人用，欠缺變身本錢。

保亞斯掛住「新莫連奴」招牌一路順風順水，率領波圖雄霸葡萄牙，仲帶過富豪球會車路士，呢啲機會真係恨死隔籬！失意車仔後，保帥決心於熱刺重振雄風，大軍擁有世界級球星加里夫巴利，射手迪科爾喺前面一個打晒，仲有柏加、丹普西同迪比利等實而不華嘅球員撐住中場，人腳遠勝西布朗，經過聯賽三連和後，撞着態沉嘅西布朗係時候贏番場。