撐曼聯客勝富咸

猪拉多纳

祖爾對親費Sir 例扯白旗

英超尾場曼聯作客富咸，兩隊教頭關係非比尋常，富咸主帥祖爾對親曼聯領隊費格遜都會自動波讓路，「紅魔鬼」教頭費格遜亦投桃報李，季初放咗射手貝碧托夫畀富咸回禮，今次呢位射手有傷冇得倒戈，富咸更冇爭勝本錢，相信祖爾會再一次扯白旗，強捧客勝！

（有線300及200台周日凌晨1時30分直播）
貝碧有傷無緣倒戈

費格遜不嬲都幾欣賞祖爾，03年佢副手奎雷斯去咗教皇馬，當時費爵爺親自斟祖爾做佢「冧巴吐」，雖然最後食檸檬，但兩人仍然保持良好關係。祖爾其後帶熱刺對老費未贏過，上年去到富咸仲愈來愈識做，至今4戰「紅魔鬼」全部輸晒，包括上季喺主場淨吞5蛋，今次兩隊再交手，相信祖爾唔敢冒險破壞呢段「親密關係」。

祖爾季初開聲話要貝碧托夫，費爵爺二話不說畀「hea碧」過檔，呢位射手好憎費Sir，當初離隊都冇同佢道別，勁想射瓜曼聯落老費面，可惜佢上場踢生日波開心得滯搏到傷咗，今戰難望披甲。富咸喺轉會窗關閉前借得AC米蘭中場艾曼紐臣同阿積士中場艾安安奧等人，今仗不妨畀班新兵試一試，但始終新兵上陣欠默契，好難期望第一場就有貨交。
誓搶3分甩開曼城

另一邊廂曼聯前線火力強勁，射手尹佩斯長期當弗，另一箭頭朗尼近兩戰入3球狀態火速冒升，後備殺手查維亞靴南迪斯前仗喺足總盃對富咸梅開二度，另外艾拉今季已錄得4入球5助攻嘅超靚數據，紅魔進攻瓣瓣都咁勁，要攻破富咸防線唔係難事！紅魔現時喺聯賽甩開次席曼城7分，費Sir話明唔可以重蹈上屆臨尾香嘅覆轍，對住富咸真係1分都不能少，熱捧客勝！