水手力保榜首氹買家收購

猪拉多纳

澳職「一哥」中岸水手今午出訪衞冕嘅布里斯班獅吼，除咗話想進一步拉開榜首領先距離，更希望憑住好表現嚟吸引兩個潛在亞洲買家盡快扑錘收購，以解決長期缺「水」之苦，2.65倍客勝抵捧！

（有線64及204周五下午5:00直播）

目前喺聯賽榜帶離次席墨爾本勝利5分嘅水手，今季表現穩定，上輪前列大戰就輕取阿德萊德聯3:1，但要注意一點，呢場係佢哋賣走中場指揮官湯洛積畀些路迪後嘅第一場波，並由新西蘭國腳麥堅治派牌，結果效果一樣掂，不過為咗練好默契迎接季後賽，估計嚟緊比賽會繼續贏得就贏，唔會留手。
獅吼新帥亂排陣

之不過，呢支新南威爾士省球會近年一直陷於財困，據聞管理層未來2至3周就會約兩個亞洲買家團體嚟參觀大本營，商討賣盤可能性。為咗提升成事機會，爭取佳績自然係其中一個好辦法，今仗使乜驚佢哋唔搏？

獅吼呢邊，今季走咗教練保斯迪高路即時戰績下滑，之後改用拉度維度錫都唔掂，直到舊年年底由梅維爾接手，都只係見到少少起色，想話同水手砌？似乎唔多夠班。佢哋啱啱由燕豪芬借用前鋒尼蘭特，不過搞笑係，梅維爾竟安排呢個荷蘭仔打10號位策劃進攻，要知道佢踢到依家24歲仔都未見有任何突出表現，獅吼想靠佢翻身？咪玩啦！