藍黑紅紅黑 重生定律

猪拉多纳

「藍轉紅定律」助巴洛迪利重生？「腦殘」加盟AC米蘭，到底前途似錦抑或似「咁」，令人關注。各位「巴神」fans可以放心，根據以往前國際米蘭球員轉投AC米蘭，多數可起死回生，甚至創事業巔峰，最佳例子必數派路及施多夫，佢哋成功由國米棄將變身歐聯冠軍中場。

巴洛迪利能否好似兩位前輩留効AC十年，仲係未知之數，但「紅黑兵團」的確存在有利佢發展嘅條件。首先，佢雖然係國米青訓出身，但早已表明自己係AC球迷，能為愛隊効力，當然會比較落力。其次「巴神」冇咗「契爺」文仙尼護蔭，相信唔敢再放肆亂嚟，正如佢喺意大利國家隊一直循規蹈矩。

另一點係巴洛迪利同AC新星艾沙拉維被譽為當今意國最天才橫溢球員，兩位「90後」喺上年11月國際熱身賽，一齊正選為意大利鬥法國，合作絲絲入扣。兩位天才重逢令人期待，亦可為江河日下嘅意甲帶來新刺激。