禾堡執番正仲有排「威」

猪拉多纳

本輪德甲主題係打吡戰，除咗Macot同大家分析嘅北威州魯爾地區打吡外，聽晚仲有漢堡對雲達不來梅嘅北方打吡，同史特加對拜仁慕尼黑嘅南方打吡。至於Alwin喺呢度同大家研究嘅，就係漢諾威主場對禾夫斯堡嘅下薩克森州打吡，禾夫斯堡喺新領導層帶領下愈戰愈勇，今晚作客唔赦防線問題嚴重嘅漢諾威，禾堡受讓平半宜捧下盤。

（周六晚10時30分開賽）

禾堡新領導班子喺歇冬前接手球隊後，做咗大量工夫，新經理K阿羅夫斯除咗引入多蒙特進攻多面手比列錫，以及同表現出色嘅門將比拿利奧續簽新約，同時亦致力裁減冗員，將球隊資源重新執過，至於赫基則喺戰術同排陣方面見功夫，上仗歇冬後第一場主場比賽，就以2比0輕取史特加，中場大腦迪亞高重新爆發，佢將比列錫放喺右中場呢個全新位置亦見成效，球隊本身人腳實力甚強，目前計質計態，絕對在同州對手漢諾威之上。
漢諾威防線如紙紮

漢諾威上輪喺歇冬後重開嘅周五晚獨腳戲亮相，結果喺逾200個國家及地區直播嘅焦點戰，同史浩克合演一場推廣德甲嘅入球騷，漢諾威最終作客以4比5落敗，雖然各方面對佢哋嘅鬥志大加讚賞，不過球隊防線問題始終無法解決，啱啱加盟嘅阿仙奴借將中場佐羅錯漏百出。

至於今場嘅致命傷係防守中場沙治奧賓度累積5面黃牌要停賽，要知道佢一直以跑不完嘅氣力喺中場做大量dirty job，今仗漢諾威孱弱防線冇埋呢個第一道屏障，勢難頂得住禾堡反擊，Alwin相信今仗入球唔會少，但對受讓嘅禾堡坐和望贏更有信心。
Alwin 推介：

禾夫斯堡下盤 ★★★★

奧格斯堡大 ★★★★

賀芬咸讓球勝 ★★★