放走王牌射手馬瑟韋爾難言「聖」

猪拉多纳

踏入「後流浪年代」嘅蘇超，雖然冠軍已經係些路迪囊中物，但亞軍兼歐霸盃席位爭奪戰其實極之激烈，今晚由馬瑟韋爾主場對聖莊士東一戰，對前列排名尤其關鍵。只係隨住箭頭占美梅菲離隊，馬瑟韋爾等同被斬去雙手，火力大減，今晚仲憑乜去讓平半？安高會捧1.99倍下盤囉！

（now638台周日晚10:15直播）
聖莊士東爭歐洲賽資格留主力

隨住格拉斯哥流浪因破產被逐出超聯後，今季蘇超已成為些路迪一家獨大局面，不過第2名之爭就變成大混戰，家陣由第2位恩華尼斯到第6位聖莊士東，都只係相差4分，最後邊隊跑得出都好難講。本來形勢唔曳嘅馬瑟韋爾，踏入2013年竟即刻放走今季轟入10球嘅北愛射手占美梅菲去錫菲聯，要知道呢班波上月底最後4戰取得2勝1和1負，占美梅菲當中入咗5粒，依家冇佢孭飛，就算球隊啱啱由英冠哈特斯菲爾德借入前鋒卡林希堅保咸補飛，都咪寄望太大。

另邊廂，啱啱有中場李安奇治宣布季尾過檔喜伯年嘅聖莊士東，其實都極之需要取得歐洲賽資格吸引主力留隊。事實上，佢哋目前陣內兩大入球王︰前鋒尼祖哈索賓基同中場梅利大衞臣，都放晒聲氣話考慮季尾離隊，或者去英格蘭發展，家陣為公為私，既為歐洲賽資格，又為自己爭取轉會講價本錢，佢哋肯定會搏老命，今場受讓隨時成個盤贏晒番嚟o架！