多蒙特防線曳不來梅有計

猪拉多纳

德甲本周重開，就即刻帶嚟拜仁揮低其他球會、請到金牌教頭哥迪奧拿下季接手嘅好消息，而衞冕嘅多蒙特就有紐尼沙軒回巢，兩隊今晚先後喺直播場次出場，當然希望可以取得新年首捷啦！不過多蒙特今晚作客雲達不來梅都有唔少暗湧，畢竟小弟認為紐尼沙軒對多蒙特作用唔大，作客讓唔起半一。

（有線61、64、201及204周日凌晨1:30直播）
簽紐尼沙軒幫唔到手

紐尼沙軒前季幫多蒙特捧盃，但佢去到皇馬同利物浦都冇乜表現，今次回歸當然想重振雄風，可惜「蜜蜂兵團」已經有隊長基爾同新星根度簡坐鎮中場，所以紐尼沙軒回巢都只係畀主帥高普多個人用咁解。事實上，多蒙特嘅最大問題始終係防線，中堅蘇保迪受傷要長抖，得番菲臘比辛坦拿同曉姆斯兩個中堅，盛傳要提升U19嘅根達上一隊幫手頂檔。

雲達不來梅近期亦積極增兵，除咗簽入克羅地亞22歲年輕防柏夫洛域外，亦向車路士留用借將奇雲迪布尼，呢位比利時翼鋒今季已經有4個入波同5次助攻，佢同啱啱宣布留隊嘅肯特係不來梅進攻命脈，今場對住多蒙特條防線應該有計。
頂占筍盤：雲達不來梅（下盤）