巴塞蓄銳數胡

猪拉多纳

馬拉加歇冬盡興未回魂

今晚西甲上演矚目尾場，馬拉加擺下擂台，主場硬撼巴塞隆拿，不過馬拉加班球員唔知係咪歇冬期玩到high晒，表現走晒樣，幾大主力如祖亞昆、伊斯高、迪米捷利斯猶如夢遊。相反，巴塞喺上周中西班牙盃畀美斯、沙維、恩尼斯達等主力球員全程休息，今仗養精蓄銳出擊，大勝應冇難度，一於直取「讓球客勝」。（now 632周一凌晨４時直播）

馬拉加歇冬前勇挫皇馬勁威風，但放假期間唔知係咪玩得太癲，班大帝跌晒Watt，上仗聯賽作客下游球隊拉科，踢到不知所謂，最終輸一球算少喇！主力如伊斯高、祖亞昆、迪米捷利斯等明顯未上力，雖然上周中西盃馬拉加大勝伊巴四個一皮，但千祈唔好畀個比數呃咗，因為佢哋喺反勝過程贏得極辛苦，又搏得咁盡，今仗仲有鐵衞捷西斯加美斯要坐波監，主場出戰都不宜高估。
「地上最強」衝半程紀錄

相反，巴塞喺上周中西盃豪贈科爾多瓦五蛋，由於助教勞拉喺三個換人名額用咗馬斯巴查、莊拿芬杜斯山度士及基斯甸泰路，令王牌射手美斯全場笑晒口坐冷板，加埋將主力域陀華迪斯、碧基、沙維、恩尼斯達等全部收起，成班猛將抖夠今仗猛虎出柙，況且只要贏埋呢場，巴塞就會以十八勝一和不敗嘅成績，創下西甲歷來最佳半程紀錄，面對馬拉加必定盡砌，巴塞贏兩粒問題不大，捧「讓球客勝」。