烏德勒支「主勝」餐士面

猪拉多纳

主帥熟晒路 恰死阿積士

荷甲歇冬前嘅最後一戰，力爭首循環冠軍嘅阿積士卻遇上剋星烏德勒支。佢哋近3季去到烏隊嘅加爾根沃德球場竟然全數落敗黑到爆燈，始終烏德勒支主帥禾達斯，無論球員時代定教波之後都喺阿積士搵食多年，對客隊一切都瞭如指掌，今晚要保住不敗有幾難？阿積士讓波寧博2.02倍「讓球主勝」。

（now639台周日晚7:30直播）

前荷蘭國腳禾達斯球員時代踢過阿積士6年，退役後做過阿積士青訓同正規軍教頭，基本上對阿積士成個青訓體制、踢法戰術都熟到爆，自從佢喺09年加盟烏德勒支做助教之後，呢支中前列球隊連續3季喺聯賽主場都砌低阿積士，話唔關佢事都冇人信！
烏德主場惡 「1哥」川迪都冇符

依家排喺荷甲第6嘅烏德勒支近3場聯賽不敗，近況絕對唔失禮，如果單計主場，佢哋近4戰更係取得3勝1和，強如聯賽 「1哥」川迪嚟到都只係和波走人，阿積士憑乜去攞3分先？至於客隊呢邊，3連勝無疑係威係勢，但今戰遇剋星即刻冇晒心理優勢，加埋前線賴恩巴布又話有傷，守將艾達韋列特同門將華美亞都係啱啱傷愈，就算可以復任正選發揮都隨時受影響，今鋪作客讓波認真牙煙。