巴塞訪華拉度列有麻煩

猪拉多纳

雖然「世界末日」言論充斥，令悲觀情緒蔓延，但西甲卻反潮流「溫情滿人間」，先有皇馬及AC米蘭兩大巴塞宿敵，向維蘭路華送上祝褔，後有巴塞準備與老將艾比度續約，考慮到該名法國國腳明夏將年滿34歲，肝病亦只係初愈，儘管如此，巴塞仍然願意孭起薪金包袱，可見佢哋唔只係一家球會，更係一個「溫暖嘅家」。
華拉度列早前僅負皇馬

作為一間成功球會，除咗要有好成績，球會有冇人情味都係好緊要，巴塞無疑較皇馬優勝。「地上最強」以15勝1和嘅史上最佳開季成績，懾服所有球迷，歇冬前夕今晚要作客華拉度列，對手雖然只係排喺西甲中游，但主場卻係其強項，今季首8輪喺主場出擊只曾兩敗，唔會任人魚肉。

華拉度列喺主場鍾意打快速傳球嘅進攻足球，兩周前對皇馬就踢出漂亮一仗，最終僅敗算係唔好彩，艾拔、奧斯卡干沙利斯同埋文路祖3名進攻球員，近期表現都相當出色，今仗雖然難有勝算，但若肯同巴塞對攻，定必贏盡球迷歡心。

（now632台周日凌晨1:00直播）