馬拉加齊心主場打真軍

猪拉多纳

「世界末日」後嘅第一日，依然係舞照跳、工照返、波照玩！今晚西甲有場好波等住大家睇，由馬拉加主場迎戰皇家馬德里。馬拉加雖然財困，但卻愈戰愈勇，相反皇馬士氣勁差，今晚一於捧受讓嘅主隊，博2.42倍「讓球主勝」！

（now632台周日凌晨3:00直播）

由於馬拉加財政唔穩健，就算要出戰歐聯亦忍痛割愛，將辛迪卡索拉賣畀阿仙奴，點知戰績卻未受影響，歐聯早早首名出線，聯賽亦企穩第4位。馬拉加有目前成績， 中場祖亞昆當然係重心，新進國腳伊斯高更係一大發現，加埋前線「野兔」沙維奧拿，火力絕對有保證。

相反「銀河艦隊」畀巴塞隆拿拋離13分咁多，衞冕之路已經好難行，仲要畀同市宿敵馬德里體育會比下去，歐聯亦屈居多蒙特次名出線，導致16強就遇上曼聯，球迷當然唔收貨啦！
皇家馬德里士氣曳

近期皇馬負面消息浪接浪，莫連奴同星級主將不和消息日日新鮮，「寸王」亦公開批評球員表現，相信一連串事件令到軍心受損，上場主場對愛斯賓奴都只係和局收場，今晚就算有賓施馬復出，都未必可以贏波。
張峰來料：馬拉加（讓球主勝）