利物浦爆深層次矛盾

猪拉多纳

英超聖誕新年快車殺到，呢段時間係一隊波成季嘅轉捩點，利物浦嘅快車對手全部係中下游球隊，假如撼同級對手都咁濕滯嘅話，「紅軍」真係隨時搞到要護級！

利物浦「降呢」喺中游打滾，「紅軍」球迷亦早已面對現實，目標求其唔好衰過同市宿敵愛華頓就算，點知依家「利記」仲係落後「拖肥」5分，領隊羅渣士喺壓力下更講多錯多，上仗輸畀維拉，羅帥賽後話做足備戰工夫都要大敗，暗示班球員唔掂。係，呢啲真心話其實只可以埋藏心底，公開咁講，會搞到隊波存在深層次矛盾，難怪上仗成隊「紅軍」，淨係得蘇亞雷斯同謝拉特跑啦！

富咸之前受到中前場嚴重傷病困擾，影響球隊攻守部署，依家情況好轉，加埋上季雙炒「紅軍」，有啲格食格，利物浦要重返勝軌唔易。