馬主論戰

猪拉多纳

好香港收復失地

　　沈集成今晚手馬幾惡，我睇應該有馬贏，推介第四場「好香港」，上場初出跑谷草1200米，大半程守喺包尾，但直路逢馬過馬，最後只以頭位輸畀「勁卒過河」得第二，後駒再出再贏，反映賽績水準高。今次呢隻馬再配白德民跑同程，應該可以收復失地。

　　另外鍾意尾場「友瑩果」，季內三戰獲冠亞季各一，演出夠晒準，今次排內檔兼繼續交由韋達操刀，大有機會連捷。

張敬山

捧蔡明紹但求勝

　　剛啱蔡明紹騎「加州萬里」捧走香港盃，真係後生可畏，我睇好佢今晚繼續有馬贏。鍾意第三場「金瑞」，近兩戰非冠即亞，演出相當穩定，增程跑1800米應更啱呢匹均速馬發揮，可贏番一仗。

　　另一匹蔡明紹坐騎，推介第六場「但求勝」，上場放到終點前輸少少其實有啲唔抵；雖然今次改排外檔，但呢隻馬前速可靠，應可以及早搶出領放，小心就咁畀佢放到。

任達華

吼實雄姿儷影

　　方嘉柏剛戰憑「天久」勝出香港短途錦標，搏殺手風好順，今晚方廐都有唔少惡馬，應該繼續有頭馬見面。推介第二場「雄姿儷影」，前仗轉倉初出追入第三，上場大熱倒灶雖然稍失望，但今次改配何澤堯減磅，要吼實。

　　另外我哋隻「鐳射槍」都有份上陣，呢隻馬近兩場都跑近，今次繼續搵韋達操刀，希望贏番一場喇。

寇鴻萍、梁廷鏘