大摩中三元稱皇

猪拉多纳

不嬲都鍾意喺大賽日攞威嘅大摩，尋日除咗靠九歲老馬「步步穩」捧走香港一哩錦標，其餘本地賽事嘅表現一樣醒神，先後靠「甜將」同「超皇鷹」增添戰功，喺大賽日連中三元，認真威水。
  
超皇鷹從馬群中竄上爆出廿七倍冷門，賽後大摩盛讚老將勞愛德發揮出色。





講開贏第九場二班千二米嗰隻「超皇鷹」，其實大摩同場有另一隻「花月佳期」，仲被捧成四倍熱門，點知後駒就跑得麻麻哋，反而「超皇鷹」喺勞愛德胯下好似一支箭咁後上建功，仲幫馬主攞埋60萬特別獎金。賽後大摩就話無諗過「超皇鷹」今鋪跑得咁好，佢話隻馬入直路前遠遠墮後，但都可以後上贏馬，勞愛德絕無欺場。所以大摩就話德叔一直都盡守本分，故希望馬會可以同佢續下半季牌，擺明力撐呢個南非好手。
  
大摩笑到見牙唔見眼！

甜將目標經典一哩賽


另外，尋日喺白德民胯下補中嘅「甜將」，大摩就話下仗會部署呢隻馬跑香港經典一哩賽。