13次賽事冇頭馬進帳 梁定華係時候發威

猪拉多纳

　　望望練馬師榜，榜尾係吳定強及梁定華，前者遲遲至開齋，不過，總算係最近嘅事（19/10），但梁定華自從9月18日贏完「八發八中」，至今隔了13期賽事，仍未有頭馬進帳，接近兩個月守齋嘞！應該都好dry！呢期有所突破？食粥食飯幾睇兩匹實力馬。

　　阿Jack唔係睇淡「麗晶豪情」及「上海先鋒」，因為今晚如果場地有變化，咩事都會發生！不過，上述兩駒就算跑盡，都好似攞個位置都辛苦，與其要等奇蹟出現，不如吼住「回鄉精神」及「威仔皇」好過！

回鄉精神A欄醒

　　「回鄉精神」起碼識贏，上季尾贏埋一哩（A欄），證明唔只短途掂，而佢在呢程可以同「威力高」、「神勇馬車」鬥到尾，級數有眼睇，四班負重亦不怕，今次等番A欄至跑，仲唔係想搏命。

　　至於「威仔皇」，今季跑兩場交出2亞，成日追人唔到，係有啲失運，不過，證明佢在三班唔係冇牙老虎，前仗負於「創佳績」並唔係偶一為之賽績。此馬嚟到第3仗仲保唔保持到？係有幾大風險，但一日未贏馬，華哥冇理由唔谷行去鍊盡，如場地偏慢冇乜影響，有權坐正。　

Jack