幻想家啡格得手

猪拉多纳

落飛黨頻頻出擊，當然有得有失，擒日第二場「幻想家」由14倍啡格急跌至7.6倍一箸夾中，食髓知味第四場又有隻「卡加大師」臨門由17倍一注跌至9.9倍，最終啡格以4.7倍次熱開跑，結果同前駒大有分別，三甲不入，瘋狂注碼付諸流水。
       
徐廐幻想家臨場着啡格一放而回，飛到馬到。

「幻想家」今次順利補中，其實季內連跑兩仗，呢匹馬都係成為落飛黨追捧對象，不過馬主蕭劍平對於愛駒受到熱烈支持，亦話有啲意外，但能夠敲響勝鼓，始終都係高興事。雖然今季初出一哩表現平常，蕭劍平解釋愛駒鍾意貼欄自己放頭跑，前段切忌有馬緊迫鬥燒，上次沿途被迫走外疊，難免有啲走樣，結果今場發揮最佳跑法，表現即刻唔同晒。雖然跨季至今三Ｗ都響一哩，蕭劍平始終覺得愛駒可以應付較長途程，下個目標將向千八米進軍。