朝早有動靜：鄭俊偉有心搶攻

猪拉多纳

　　今季尚餘十日便開鑼，各路人馬自然加強備戰，每朝均見不少騎練埋頭苦幹。至於鄭俊偉馬房早前已開始練兵，昨日勞愛德、杜利萊、柏寶及賴維銘等騎師也先後被奉召到場幫手操馬，而鄭俊偉則在烽火台聚精會神睇實旗下馬出試，並陪同人馬出出入入，看來有搶攻之意。

　　一眾鄭廐馬中，「勁加勁」及「好中煌」復課以來勤操猛磨，明顯是馬房的先頭部隊，昨晨又見杜利萊摸實牠們，而騎練兩人收操後更在機坪欄邊密斟，可見要留意兩駒的動向。

文家良柏寶好傾

　　除了鄭俊偉外，另一位華籍練馬師文家良昨晨亦親自督操，當旗下馬操練時，練者即金睛火眼望到實，神情緊張。此外，柏寶及安國倫昨日均替文廐操馬，前者策「華多寶」跳兩段，安國倫則替「一分一秒」跳兩段，課後更見柏寶前往烽火台跟文家良傾個不停，馬迷不妨吼實「華多寶」的進展。

蔡約翰成朝四圍撲

　　另一邊廂，昨朝蔡約翰、大摩及告東尼三大巨頭亦大舉練兵，動態可觀；當中蔡約翰是今季最早開工的練馬師之一，他爾來練兵無間，昨朝又罕有地搵多位好手協助教馬，其中包括韋達、郭立基及普萊西等。至於昨朝舉行試閘時，只見練者放下操馬工作，專心打點試閘事宜，此外又分別前往烽火台及機坪睇馬出試，其後更與各駒鞍上人交談，練者如此頻撲應有計，季初宜吼實。

韋柏